Trasport dirett jew regoli ta' nonmanipulazzjoni jew nonalterazzjoni
Regola tat-trasport dirett
Biex jibbenefikaw mill-preferenza, il-prodotti oriġinarji jridu jiġu ttrasportati direttament mit-territorju tal-parti esportatriċi lejn it-territorju tal-Unjoni Ewropea (u viċi versa) mingħajr ma jgħaddu mit-territorju ta’ kwalunkwe pajjiż terz. L-għan ta’ din ir-regola huwa li jiġi żgurat li l-prodotti li jaslu fil-pajjiż tal-importazzjoni jkunu l-istess bħal dawk li telqu mill-pajjiż tal-esportazzjoni.
Madankollu, il-prodotti jistgħu jiġu ttrasportati mit-territorju ta’ pajjiż terz bil-possibbiltà ta’ trażbord jew ħżin temporanju mingħajr ma jitilfu l-istatus oriġinarju tagħhom, dment li jibqgħu taħt is-sorveljanza tal-awtoritajiet doganali fil-pajjiż tat-tranżitu jew tal-ħżin u ma jgħaddu minn ebda operazzjoni għajr il-ħatt, it-tagħbija mill-ġdid jew kwalunkwe operazzjoni maħsuba biex tippreservahom f’kundizzjoni tajba.
L-importatur irid ikun kapaċi jagħti prova li din il-kundizzjoni hija ssodisfata, inkella jiġi miċħud trattament preferenzjali mill-awtoritajiet doganali irrispettivament mill-istatus oriġinarju tal-prodotti.
Ir-regola tan-nonmanipulazzjoni jew tan-nonalterazzjoni
F’ċerti arranġamenti kummerċjali preferenzjali, ir-regola tat-trasport dirett hija definita bħala regola ta’ “nonmanipulazzjoni” jew “nonalterazzjoni”. Taħt din il-varjazzjoni inqas ikkumplikata, il-qsim tal-kunsinni u l-operazzjonijiet għaż-żieda jew it-twaħħil ta’ marki, tikketti, siġilli jew kwalunkwe dokumentazzjoni oħra biex tiġi żgurata l-konformità ma’ rekwiżiti domestiċi speċifiċi huma permessi flimkien ma’ dawk tat-trasport dirett (ħatt, tagħbija mill-ġdid jew kwalunkwe operazzjoni mfassla biex tippreserva l-prodotti f’kundizzjoni tajba), meta jitwettqu mill-esportatur jew taħt ir-responsabbiltà tiegħu.
Ir-rekwiżiti jitqiesu li ġew issodisfati sakemm l-awtoritajiet doganali ma jkollhomx raġunijiet biex jemmnu l-kuntrarju. F’każijiet bħal dawn, l-importaturi jistgħu jkunu meħtieġa jipprovdu evidenza ta’ konformità, li tista’ tkun dawk id-dokumenti msemmija għat-trasport dirett.
Barra minn hekk, tista’ tiġi ppreżentata wkoll evidenza fattwali jew konkreta oħra bbażata fuq l-immarkar jew in-numerazzjoni tal-pakketti jew kwalunkwe evidenza relatata mal-prodotti nfushom.