Cur i bhfeidhm Rialachán EUDR maidir le táirgí nach mbíonn dífhoraoisiú mar thoradh orthu a chur siar go dtí mí na Nollag 2025

Is é is aidhm do Rialachán an Aontais maidir le Dífhoraoisiú (Rialachán (AE) 2023/1115), a foilsíodh i lár 2023, an dífhoraoisiú agus an díghrádú foraoise a bhaineann le hamhábhair thalmhaíochta a allmhairítear isteach san Aontas Eorpach a íoslaghdú. Is cuid de straitéis bhithéagsúlachta an Aontais go dtí 2030 é.

Is iad adhmad, rubar, eallach, caife, cócó, ola phailme agus pónaire shoighe nó táirgí a dteastaíonn siad sin uathu mar chuid dá monarú na táirgí a chumhdaítear leis an Rialachán. Déanfaidh Coimisiún an Aontais Eorpaigh meastóireacht ar amhábhair eile agus beifear in ann raon feidhme an Rialacháin seo a leathnú.

Dá bhrí sin, cruthóidh aon oibreoir nó trádálaí a chuireann na tráchtearraí sin ar mhargadh an Aontais, nó a onnmhairíonn uaidh, nach de thionscnamh talún atá dífhoraoisithe le déanaí iad na táirgí nó gur rannchuidigh siad le díghrádú foraoise.

Ní fhéadfar tráchtearraí ná táirgí a chumhdaítear leis an Rialachán a chur ar an margadh ná a onnmhairiú isteach san Aontas ná amach as, mura gcomhlíontar na coinníollacha uile seo a leanas:

1. tá siad gan dífhoraoisiú;
2. táirgeadh iad i gcomhréir le reachtaíocht ábhartha na tíre táirgthe; agus
3. tá siad cumhdaithe ag Ráiteas maidir le Dícheall Cuí (mar a leagtar amach in Iarscríbhinn II)

Tháinig an reachtaíocht nua sin i bhfeidhm an 29 Meitheamh 2023 agus bhí sé beartaithe ar dtús go mbeadh sí infheidhme an 30 Nollaig 2024. Mar sin féin, chomhaontaigh Parlaimint na hEorpa agus an Chomhairle le déanaí maidir leis an togra ón gCoimisiún moill bliana a chur ar a chur i bhfeidhm chun níos mó ama a thabhairt do chuideachtaí agus d’údaráis ullmhú níos fearr dá chur chun feidhme.

A luaithe a ghlacfar an togra seo, beidh an Rialachán ceangailteach ón 30 Nollaig 2025 d’oibreoirí agus do thrádálaithe móra, agus beidh ar mhicreachuideachtaí agus ar chuideachtaí beaga é a chur i bhfeidhm ón 30 Meitheamh 2026 ar aghaidh.

Idir an dá linn, d’fhógair an Coimisiún Eorpach seoladh Chóras Faisnéise EUDR d’úsáideoirí chun Ráitis Díchill Chuí a chur isteach agus a bhainistiú in dhá fhormáid:

• Freastalaí beo, i gcás ina bhfuil stádas dlí ag doiciméid agus inar féidir leis na húdaráis inniúla iad a sheiceáil: https://eudr.webcloud.ec.europa.eu/tracesnt/
• Ardán oiliúna: https://acceptance.eudr.webcloud.ec.europa.eu/tracesnt/  

Ina theannta sin, le linn dheireadh 2024 agus 2025, foilseofar seisiúin oiliúna fhíorúla nua le haghaidh Chóras Faisnéise EUDR go rialta ar an leathanach gréasáin: https://green-business.ec.europa.eu/deforestation-regulation-implementation/information-system-deforestation-regulation_en

Is féidir tuilleadh eolais a fháil ag:

• Rialachán (AE) 2023/1115 maidir le táirgí nach mbíonn dífhoraoisiú mar thoradh orthu 
• Ard-Stiúrthóireacht an Chomhshaoil — Rialachán maidir le Táirgí atá Saor ó Dhífhoraoisiú
• Dlían Aontais maidir le dífhoraoisiú: Is mian leis an bParlaimint bliain amháin eile a thabhairt do chuideachtaí chun comhlíonadh a dhéanamh
• Preaseisiúint: Is díol sásaimh don Choimisiún an comhaontú sealadach maidir le ham breise céimnithe isteach le haghaidh Rialachán EUDR