Cearta maoine intleachtúla agus tásca geografacha

Beartas trádála agus maoin intleachtúil an Aontais

Tacaíonn an tAontas le caighdeáin láidre maidir le cearta maoine intleachtúla (CMI) a dhéanann difear do ghnólachtaí agus do thomhaltóirí san Aontas agus thar lear. Tá creat dlíthiúil CMI daingean intuartha á lorg ag an Aontas don trádáil idirnáisiúnta, lena n-áirítear:

• Cearta maoine intleachtúla a spreagann nuálaíocht, a ráthaíonn tionscnamh táirgí agus a chinntíonn a mbarántúlacht, mar aon le bearta coisctheacha i gcoinne aon sárú ar na cearta sin.
• Cearta maoine intleachtúla a chosnaíonn tomhaltóirí ar tháirgí góchumtha nach gcomhlíonann caighdeáin sláinte agus sábháilteachta an Aontais.

Chun sárú ar CMI a chosc, ghlac an tAontas Straitéis athbhreithnithe maidir le Cearta Maoine Intleachtúla a Fhorfheidhmiú i dTríú Tíortha, lena ndírítear ar an méid seo a leanas:

• ag freagairt d’athruithe a rinneadh le déanaí sa timpeallacht idirnáisiúnta maoine intleachtúla, lena n-áirítear digitiú gach coda den gheilleagar agus bealaí éalaithe nua-aitheanta i reachtaíocht agus i bhforfheidhmiú maoine intleachtúla.
• na huirlisí is gá a chur ar fáil don Choimisiún Eorpach chun freagairt níos éifeachtaí a thabhairt ar na dúshláin atá ann faoi láthair.

Mar chomhalta den Eagraíocht Dhomhanda Trádála (EDT) agus den Eagraíocht Dhomhanda um Maoin Intleachtúil (EDMI), tá comhaontuithe idirnáisiúnta maidir le CMI sínithe ag an Aontas, comhaontuithe amhail an Comhaontú maidir le Gnéithe de Chearta Maoine Intleachtúla a bhaineann le Trádáil (TRIPanna). Leagtar síos i gComhaontú TRIPS na híoschaighdeáin cosanta CMI atá le soláthar ag gach tír agus nósanna imeachta chun díospóidí a bhaineann le CMI a réiteach.

I measc na CMInna i gcomhaontú TRIPS tá

• cóipcheart agus cearta gaolmhara;
• trádmharcanna lena n-áirítear marcanna seirbhíse;
• tásca geografacha lena n-áirítear sonrúcháin tionscnaimh;
• dearadh tionsclaíoch;
• paitinní lena n-áirítear cosaint cineálacha nua plandaí;
• dearadh leagan amach ciorcad iomlánaithe;
• faisnéis neamhnochta lena n-áirítear rúin trádála agus sonraí tástála.

Cearta maoine intleachtúla i gcomhaontuithe trádála an Aontais

Caibidlíonn an tAontas caibidlí CMI ina chomhaontuithe trádála le tíortha agus réigiúin eile. Is é an aidhm atá ann a áirithiú go bhfuil na caighdeáin chéanna maidir le cosaint maoine intleachtúla ag an dá chomhpháirtí trádála.

• Téann comhaontuithe trádála an Aontais níos faide ná Comhaontuithe EDT maidir le TRIPanna agus tugann siad aghaidh ar ábhair imní shonracha maidir le cearta maoine intleachtúla leis na tíortha sin.
• tá tuilleadh eolais faoi rialacha CMI i gcomhaontuithe trádála an Aontais le fáil anseo.

Beartas CMI an Aontais i leith tíortha i mbéal forbartha

Cuireann an AE feabhsú agus forfheidhmiú caighdeán CMI chun cinn i dtíortha i mbéal forbartha. Cé go bhfuil cosaint CMI níos fearr tábhachtach do ghnólachtaí an Aontais, meallann sé aistriú teicneolaíochta, infheistíocht eachtrach, taighde agus nuálaíocht chun leasa tíortha i mbéal forbartha freisin.

Cuireann an tAontas réimse ionstraimí agus clár cúnaimh theicniúil ar fáil chun cabhrú le tíortha i mbéal forbartha CMI a neartú.

Tá an tAontas tiomanta freisin do chruthúcháin, aireagáin agus dearaí an Aontais a chosaint.

Chun cabhrú leat beartais agus nósanna imeachta a fhorbairt chun luach do smaointe agus do chruthaithe a chosaint, i dTuarascáil an Aontais maidir le cearta maoine intleachtúla a chosaint agus a fhorfheidhmiú, cuirtear faisnéis ar fáil do chuideachtaí, go háirithe gnólachtaí beaga, faoi na rioscaí a d’fhéadfadh a bheith ann dá maoin intleachtúil agus iad i mbun gníomhaíochtaí gnó i dtíortha áirithe thar lear nó le tíortha áirithe thar lear.

Aistriú teicneolaíochta

Tá an tAontas agus a Bhallstáit tiomanta d’aistriú teicneolaíochta a chur chun cinn, go háirithe chuig na tíortha is lú forbairt (LDCanna).

• Creideann an AE gur féidir le beartais atá dírithe ar chóras láidir CMI a fhorbairt cabhrú le tíortha i mbéal forbartha leas a bhaint as rochtain mhéadaithe ar theicneolaíocht eachtrach.
• Is mó seans go gceadóidh cuideachtaí eachtracha eolas agus go gcomhoibreoidh siad ar chomhthionscadail nuair a bhíonn córas éifeachtach CMI i bhfeidhm.

Faigh eolas úsáideach do ghnólachtaí maidir le haistriú teicneolaíochta agus cúrsaí maoine intleachtúla.

Beartas an Aontais maidir le rochtain ar chógais

Tá an tAontas tiomanta rochtain ar chógais a éascú i dtíortha atá i mbéal forbartha agus tá sé d’aidhm aige an chothromaíocht cheart a bhaint amach idir CMI na gcuideachtaí cógaisíochta a chosaint, ar cuideachtaí iad atá ar thús cadhnaíochta sa taighde ar chógais leighis nua, agus an gá atá lena áirithiú go mbeidh na cógais leighis sin ar fáil do dhaoine ar fud an domhain. Dá bhrí sin, déanann an tAontas a chur chuige maidir le CMI a bhaineann le cógaisíocht a chur in oiriúint do riachtanais agus do leibhéal forbartha a chomhpháirtithe trádála.

Tugann an tAontas aghaidh ar shaincheisteanna éagsúla a bhaineann le hinacmhainneacht, infhaighteacht, inrochtaineacht, inghlacthacht, cáilíocht agus úsáid cógas i dtíortha ísealioncaim agus meánioncaim trí thacú leis an méid seo a leanas:

• eagraíochtaí agus tionscnaimh dhomhanda sláinte;
• córais sláinte phoiblí i dtíortha ísealioncaim agus meánioncaim;
• taighde agus forbairt (T&F;D) na gcógas a theastaíonn ó thíortha ísealioncaim agus meánioncaim;
• rialacha trádála lena n-éascaítear rochtain ar chógais.

Faigh tuilleadh eolais faoi ghníomhaíochtaí sláinte domhanda an Aontais do thíortha ísealioncaim agus meánioncaim.