Projbizzjoni tal-UE fuq l-użu u l-kummerċ tal-Bisfenol A mill-20 ta' Jannar 2025
Mill-20 ta’ Jannar 2025, ir-Regolament tal-Kummissjoni (UE) 2024/3190 jipprojbixxi l-użu u l-kummerċ tal-Bisfenol A (BPA), l-imlieħ tiegħu u bisfenoli perikolużi oħra u derivattivi tal-bisfenol perikolużi f’materjali li jiġu f’kuntatt mal-ikel madwar l-UE.
Il-bisfenol A (BPA) huwa sustanza kimika użata prinċipalment flimkien ma’ sustanzi kimiċi oħra għall-manifattura ta’ ċerti materjali li jiġu f’kuntatt mal-ikel bħar-reżini epossidiċi għall-kisi f’laned tal-metall tal-ikel u tax-xorb, u plastik durabbli għal fliexken tax-xorb li jistgħu jerġgħu jintużaw jew tagħmir għat-trasport tal-ikel.
Din il-projbizzjoni tal-BPA f’materjali li jiġu f’kuntatt mal-ikel ġiet proposta mill-Kummissjoni tal-UE u approvata mill-Istati Membri tal-UE f’Lulju 2024, wara rapport tal-2023 tal-Awtorità Ewropea dwar is-Sigurtà fl-Ikel (EFSA) li kkonkluda li l-livelli attwali ta’ esponiment għall-BPA kienu ta’ riskju għall-konsumaturi fil-gruppi ta’ età kollha peress li dawn is-sustanzi huma ta’ ħsara għas-sistemi riproduttivi u endokrinali.
Prodotti koperti mill-projbizzjoni
Il-projbizzjoni tapplika għall-użu tal-BPA fil-manifattura tal-gruppi li ġejjin ta’ materjali u oġġetti li jiġu f’kuntatt mal-ikel:
- adeżivi;
- gomom;
- reżini ta' skambju joniku;
- il-plastik;
- linka għall-istampar;
- silikoni; u
- verniċi u kisi
Dan jaffettwa l-imballaġġ, bħall-kisi użat fuq il-laned tal-metall, kif ukoll l-użu tal-BPA f’oġġetti tal-konsumatur, bħal fliexken tax-xorb tal-plastik li jistgħu jerġgħu jintużaw, coolers għad-distribuzzjoni tal-ilma jew oġġetti oħra tal-kċina.
Eċċezzjonijiet għall-projbizzjoni
Hemm eċċezzjonijiet limitati ħafna għall-projbizzjoni għal każijiet fejn ma jkun hemm l-ebda alternattiva sikura disponibbli, inkluż l-użu tagħha għall-manifattura ta’ membrani ta’ filtrazzjoni tal-plastik meħtieġa biex tiġi żgurata s-sikurezza mikrobijoloġika ta’ ċertu ikel fejn tali użu ma jitqiesx li joħloq riskju għall-konsumaturi, iżda dawn se jinżammu taħt rieżami.
Dispożizzjonijiet tranżizzjonali
Id-dispożizzjonijiet tranżitorji se japplikaw biex jippermettu lill-industrija tadatta u tevita tfixkil potenzjali fil-katina alimentari:
- oġġetti finali b’użu uniku u b’użu ripetut li jiġu f’kuntatt mal-ikel li jikkonformaw mar-regoli applikabbli qabel id-data tad-dħul fis-seħħ tar-Regolament (UE) 2024/3190, li ma jikkonformawx mar-regoli l-ġodda, għandhom jitħallew jitqiegħdu fis-suq tal-Unjoni sal-20 ta’ Lulju 2026.
- l-oġġetti finali li jiġu f’kuntatt mal-ikel li jintużaw darba biss bl-użu ta’ verniċ u ta’ kisi manifatturati bil-BPA, speċifikament għall-imballaġġ użat għall-preservazzjoni tal-frott, tal-ħxejjex u tal-prodotti tal-ħut ipproċessati, jistgħu jkomplu jiġu kkummerċjalizzati fl-UE sal-20 ta’ Lulju 2028.
- l-oġġetti finali li jiġu f’kuntatt mal-ikel li jintużaw darba biss imqiegħda fis-suq f’konformità mar-regoli preċedenti, jistgħu jimtlew bl-ikel u jiġu ssiġillati matul it-12-il xahar wara l-iskadenza tal-perjodu tranżitorju applikabbli u l-ikel ippakkjat li jirriżulta jista’ jitqiegħed fis-suq sakemm jispiċċaw l-istokkijiet.
- l-oġġetti finali b’użu ripetut li jiġu f’kuntatt mal-ikel użati bħala tagħmir professjonali tal-produzzjoni tal-ikel, li jikkonformaw mar-regoli applikabbli qabel id-data tad-dħul fis-seħħ tar-Regolament (UE) 2024/3190, li ma jikkonformawx mar-regoli l-ġodda, jistgħu jitqiegħdu fis-suq għall-ewwel darba sal-20 ta’ Jannar 2028.
- l-oġġetti finali b’użu ripetut li jiġu f’kuntatt mal-ikel li tqiegħdu għall-ewwel darba fis-suq f’konformità mar-regoli preċedenti, jistgħu jibqgħu fis-suq sa mhux aktar tard mill-20 ta’ Jannar 2029