Ftehimiet kummerċjali

Ftehimiet ġodda jkomplu jiżdiedu man-netwerk, filwaqt li ftehimiet aktar antiki jiġu rieżaminati u jiġu nnegozjati aġġornamenti mal-pajjiżi sħab.

Tneħħija tat-tariffi

Uħud mill-ftehimiet jiffukaw prinċipalment fuq l-eliminazzjoni tat-tariffi:

• Ftehimiet ta' Assoċjazzjoni mat-tmien pajjiżi Mediterranji (l-Alġerija, l-Eġittu, l-Iżrael, il-Ġordan, il-Libanu, il-Marokk, it-Territorju Okkupat Palestinjan u t-Tuneżija)
• Ftehimiet mal-Messiku u ċ-Ċilì
• Ftehimiet dwar iż-Żona Ekonomika mal-Islanda, il-Liechtenstein u n-Norveġja;
• Unjonijiet Doganali mat-Turkija, Andorra u San Marino
• Ftehimiet ta' Stabbilizzazzjoni u Assoċjazzjoni mas-sitt pajjiżi tal-Balkani tal-Punent (l-Albanija, il-Bosnja-Ħerzegovina, il-Kosovo, il-Montenegro, il-Maċedonja ta' Fuq u s-Serbja) li fihom dispożizzjonijiet addizzjonali bi tħejjija għall-integrazzjoni progressiva tagħhom fis-suq tal-UE
• Ftehimiet mal-Iżvizzera u l-Gżejjer Faeroe.

Aċċess aktar komprensiv għas-suq

Ftehimiet oħra jinkludu impenji ħafna usa’ dwar il-ftuħ tal-kummerċ fil-prodotti u s-servizzi, kif ukoll l-investiment, l-akkwist pubbliku, il-kompetizzjoni, is-sussidji u kwistjonijiet regolatorji:

• Il-Kanada
• L-Amerika Ċentrali (il-Kosta Rika, El Salvador, il-Gwatemala, il-Ħonduras, in-Nikaragwa u l-Panama)
• Il-Kolombja, l-Ekwador u l-Perù
• Singapore
• Il-Korea ta' Isfel
• il-Vjetnam.

Dawn il-ftehimiet għandhom l-għan li jiżviluppaw reġimi kummerċjali aktar b’saħħithom ibbażati fuq ir-regoli u bbażati fuq il-valuri mas-sħab kummerċjali kkonċernati u jinkludu dispożizzjonijiet speċifiċi dwar il-kummerċ u l-iżvilupp sostenibbli.

Ftehimiet reċenti għandhom ukoll dispożizzjonijiet speċifiċi biex jindirizzaw l-isfidi li jiffaċċjaw l-ekonomiji u s-soċjetajiet moderni, bħall-Ftehim ta’ Sħubija Ekonomika mal-Ġappun, li jinkludi kapitolu dwar l-intrapriżi żgħar u ta’ daqs medju u dispożizzjonijiet speċifiċi dwar is-servizzi tal-informazzjoni u tat-telekomunikazzjoni u l-kummerċ elettroniku.

Approssimazzjoni legali

Tip speċifiku ta’ ftehimiet jikkonċentraw fuq l-issikkar tar-rabtiet ekonomiċi bejn l-UE u l-ġirien tagħha billi jqarrbu l-oqfsa regolatorji tagħhom lejn il-liġi tal-UE, b’mod partikolari f’oqsma relatati mal-kummerċ. Dan huwa minnu pereżempju għall-ftehimiet ma’:

• Georgia
• Moldova
• l-Ukrajna.

L-iżvilupp

Tip speċjali ieħor ta’ ftehim għandu objettiv espliċitu ta’ żvilupp. Dawn huma ftehimiet kummerċjali asimmetriċi li fihom il-pajjiżi Afrikani, tal-Karibew u tal-Paċifiku (AKP) ikkonċernati jilliberalizzaw madwar 80 % tal-kummerċ fuq perjodu ta’ bejn 15 u 20 sena, filwaqt li l-UE tagħti aċċess mingħajr dazju u mingħajr kwoti mill-ewwel jum.

Il-biċċa l-kbira ta’ dawn il-ftehimiet ikopru l-kummerċ fil-merkanzija u l-kooperazzjoni għall-iżvilupp. Il-Ftehim ta’ Sħubija Ekonomika (FSE) mal-Karibew jinkludi wkoll dispożizzjonijiet dwar is-servizzi, l-investiment u suġġetti oħra relatati mal-kummerċ.

Skont dawn il-ftehimiet, l-UE tipprovdi assistenza sostanzjali relatata mal-kummerċ biex tgħin lill-pajjiżi sħab jimplimentaw il-ftehimiet, isaħħu l-kompetittività tal-esportazzjoni u jiżviluppaw infrastruttura ekonomika. Il-pajjiżi kkonċernati jappartjenu għall-grupp AKP:

• Il-Punent ta' l-Afrika (il-Gana, il-Kosta ta' l-Avorju)
• L-Afrika Ċentrali (il-Kamerun)
• L-Afrika tal-Lvant u tan-Nofsinhar (il-Komoros, il-Madagaskar, il-Mawrizju, is-Seychelles u ż-Żimbabwe)
• Il-Komunità għall-Iżvilupp tan-Nofsinhar tal-Afrika (il-Botswana, l-Eswatini, il-Lesoto, il-Mozambique, in-Namibja u l-Afrika t’Isfel)
• Cariforum (Antigwa u Barbuda, il-Baħamas, il-Barbados, il-Beliże, Dominika, ir-Repubblika Dominikana, Grenada, il-Guyana, il-Ġamajka, San Kitts u Nevis, Santa Luċija, San Vinċenz, is-Surinam, u Trinidad u Tobago)
• Il-Paċifiku (Fiġi, Papua New Guinea, Samoa u l-Gżejjer Solomon).